KRONIKA E ZEZË

Avokati Tomë Gashi del para Gjykatës, ja për çfarë akuzohet

Është mbajtur shqyrtimi gjyqësor ndaj avokatit Tomë Gashi i cili akuzohet për veprën penale ‘‘Shkelje e fshehtësisë së procedurës’’ gjatë gjykimit të Azem Sylës.

I njëjti para gjykatës u deklarua i pafajshëm dhe tha se nuk kishte vendim nga gjykatësja që ajo seancë dëgjimore ishte konfidenciale dhe se dëshmitarët ishin në mbrojtje. Sipas Gashit kjo është bërë më qëllim të dëmtimit të imazhit të tij, raporton “Betimi për Drejtësi”.

‘‘Ata edhe me pas dashtë me me dëmtu e që kanë dashtë, nuk kanë ditë, juridikisht nuk kanë ditë, sepse me pas ditë është dashtë me nxjerrë aktvendim paraprak se gjithçka është konfidenciale, me ma jep një vendim që unë ta nënshkruaj duke i ditur pasojat’’, u shpreh Gashi duke iu referuar gjykatëses se Eulex-it, Marie Tuma.

Prokurori i rastit, Blerim Igrishta tha se i qëndron prapa aktakuzës ku  sipas provave e që sipas tij, janë linqet e mediave, vërtetohet se i akuzuari Gashi ka zbuluar emrin e dëshmitarit duke bërë kështu vepër penale.

“Kësaj gjykate i kemi ofruar tri apo me shume linqe të mediave publike e po ashtu edhe fotografi në të cilën është bazuar edhe kjo aktakuzë. Me elaborimin e të njëjtave do të vërtetohet fajësia e tani te akuzuarit” u shpreh prokuroi Igrishta.

I akuzuari Gashi po ashtu në provat e ofruara gjykatës ishin disa linqe të lajmeve të publikuara në disa media e që sipas tij ishin deklarata para se të mbahet seanca dëgjimore. Ai gjithashtu ofroi edhe disa prova të tjera që sipas tij e dëshmojnë pafajësinë e tij.

Të njëjta gjykatësi i vetëm në këtë proces gjyqësor, Eroll Gashi, i refuzoi me arsyetimin se të këto prova gjenden në shkresat e lëndës dhe se disa prej tyre kanë të bëjnë me fazë tjetër të procedurës.

Në këtë seancë nuk u thanë fjalët përfundimtare pasi prokuroi i shtetit, Blerim Igrishta kërkoi që kjo seancë të shtyhet pasi ka angazhime tjera gjatë ditës.

Seanca e rrallës u caktua më 15 mars 2021 në ora 13:20.

Sipas aktakuzës së përpiluar më 16 mars 2018, nga prokurori Blerim Igrishta, avokati Gashi më 29 prill të vitit 2016, rreth orës 10:54, pasi që paraprakisht kishte përfunduar seanca dëgjimore  në Gjykatën Themelore në Prishtinë, e ku në procesverbal ishte informuar nga gjykatësi i rastit se seanca është e mbyllur dhe se duhet të ruhej si konfidencialitet ajo çfarë flitej aty, i njëjti me të dal nga seanca, pa autorizim ishte zbuluar të dhënat për identitetin e personit të mbrojtur në procedurë penale duke iu drejtuar mjeteve me deklarata dhe duke përmendur emrin e tij në mënyrë publike.

Lajmet të tjera

Back to top button